Nature.is

Ræstingarþjónustan Hreint er komið með Svansvottun

Hreint ehf hefur fengið vottun Norræna umhverfismerkisins Svansins fyrir ræstingarþjónustu. Strangar kröfur Svansins tryggja að fyrirtækið er í fremstu röð hvað varðar lágmörkun neikvæðra umhverfis- og heilsuáhrifa starfseminnar.

Aðstoðarmaður umhverfisráðherra veitti leyfið föstudaginn 25. júní, klukkan 11:00 á aðalskrifstofu fyrirtækisins að Auðbrekku 8 í Kópavogi. „Það er okkur hjá Umhverfisráðuneytinu gleðiefni að sjá að stöðugt fleiri íslensk fyrirtæki bætast í fríðan flokk Svansvottaðra fyrirtækja. Með því að uppfylla kröfur Svansins tryggja fyrirtækin að vörur þeirra og þjónusta lágmarki neikvæð áhrif á umhverfið. Þetta er auðvitað sérstaklega mikilvægt í geira eins og ræstingum þar sem notkun sterkra og skaðlegra efna eru oft hluti starfseminnar. Það má því segja að Svansvottun Hreint færi okkur enn einu skrefinu nær hreinni og heilnæmari heimi og því ber sannarlega að fagna.“ segir Svandís Svavarsdóttir, umhverfisráðherra.

Sjá fyrirtækin níu sem hafa Svansvottun hér á landi á Grænum síðum.

Sjá þá vöruflokka sem eru í boði af Svansvottuðum vörum hér á landi undir „Vörur/Vottað Svanurinn“ en í hverjum flokki finnur þú hvaða fyrirtæki flytja inn/dreifa viðkomandi vöruflokki og hvað vörurnar heita. Sé varan til nákvæmlega skráð til sölu eða kynningar er hana að finna í Svansbúðinni hér á Náttúrumarkaði. Samsvarandi flokkur er fyrir þjónustuflokkana undir „Þjónusta/Vottað Svanurinn“ hér á Grænum síðum.

Einnig er hægt að sjá gott yfirlit yfir aðilana hér á Græna Íslandskortinu í flokknum „Umhverfisvænar vörur“.

Um Hreint
Hreint ehf. er íslenskt fyrirtæki sem var stofnað 12. desember 1983 og er eitt elsta og stærsta ræstingaþjónustufyrirtæki landsins. Fyrirtækið sérhæfir sig í að þjóna fyrirtækjum og stofnunum með reglulegri ræstingu og tengdri þjónustu. Starfssvæði þess er höfuðborgarsvæðið, Akureyri, Akranes, Hveragerði og Selfoss. Hreint er meðal 300 stærstu fyrirtækja landsins en á síðustu 8 árum hefur fyrirtækið vaxið 8 sinnum að veltu og er nú annað stærsta fyrirtækið á þessu sviði hérlendis. Starfsmenn eru um 130 en þar af starfa 115 við ræstingar. Framkvæmdastjóri Hreint Ari Þórðarson segir: „Í öllu okkar starfi leggjum við áherslu á gildin okkar sem eru; frumkvæði, samvinna, traust og fyrirmynd. Frá formlegri vottun Svansins hefst nýr kafli í sögu og þróun Hreint enda um tímamót að ræða. Sem fyrirtæki teljum við að Svanurinn er sé mjög mikilvægt skref til frekari gæðaaukningar á mörgu í starfseminni, aukinni umhverfisvernd, vexti og aukinni arðsemi rekstrarins.”

Kröfur Svansins fyrir ræstiþjónustur:
- Strangar kröfur um efnanotkun. Að minnsta kosti 50% hreinsiefna verða að vera umhverfismerkt, bann við notkun efna sem eru skaðleg umhverfinu og heilsu fólks. Heildarnotkun efna er lágmörkuð með réttri skömmtun.
· Mengun vegna flutninga fyrirtækisins er lágmörkuð með kröfu um nýlegan bílaflota sem uppfyllir kröfur um útblástur.
· Lögð er áhersla á að lágmarka notkun plastpoka, flokka úrgang og velja umhverfismerktar vörur í innkaupum.
· Gæði ræstingar eru tryggð með reglulegri þjálfun og fræðslu starfsmanna ásamt ferlum til að fylgjast með gæðum þjónustunnar.

Evaluation

Kaffitár fær Svansleyfi, fyrst íslenskra kaffihúsa

Kaffihús Kaffitárs hlutu vottun norræna umhverfismerkisins Svansins föstudaginn 14. maí til staðfestingar á góðum árangri í umhverfismálum. Strangar kröfur Svansins tryggja að starfsemi Kaffitárs er í fremstu röð hvað varðar lágmörkun neikvæðra umhverfis- og heilsuáhrifa. Umhverfisráðherra, Svandís Svavarsdóttir, veitti leyfið.

„Það er ánægjulegt að sjá hversu mörg fyrirtæki hér á landi sjá hag sinn í því að geta boðið upp á vottaða vöru og þjónustu. Það er ljóst að vistvæn innkaupastefna ríkisins hefur tilætluð áhrif sem lýsir sér í auknum áhuga á Svansvottun. Kaffitár er fyrsta kaffihúsið hér á landi sem fær Svansvottun á þjónustu sína en fyrirtækið hefur lengi lagt áherslu á umhverfismál og sanngjörn viðskipti (fair trade)“ segir Svandís Svavarsdóttir umhverfisráðherra.

„Í kaffiheiminum er sífelld meiri áhersla lögð á umhverfisstarf í allri virðiskeðjunni frá baun í bolla. Okkar reynsla af umhverfisstarfi síðustu tvö ár er að það er fjárhagslegur ávinningur í að vinna samkvæmt virkri umhverfisstefnu. Það var því eðlilegt framhald fyrir okkur að vinna í að fá umhverfisstarfið vottað og skemmtilegt að það gat orðið með innleiðingu Svansins í kaffihúsum okkar. Gildi þjálfunar og símenntunar fyrir starfsfólki er einnig verðmætur þáttur í umhverfisstarfinu og hefur tekist einstaklega vel að virkja samstarfsmenn í nýju verklagi vegna Svansins. Allir hafa verið mjög jákvæðir og virkir, sem er lykilatriði í að innleiðingin gangi upp. Segja má að það sé samfélagsleg ábyrgð okkar að sýna vistvernd í verki og fá gesti kaffihúsa okkar virka með í það samstarf“ segir Stella Marta Jónsdóttir framkvæmdastjóri Kaffitárs.
Um Kaffitár

Kaffitár tók til starfa sem kaffibrennsla árið 1990 og fyrsta kaffihúsið var opnað árið 1995. Í dag eru kaffihúsin orðin átta talsins en Kaffitár hefur sinnt frumkvöðlastarfi við að kynna kaffimenningu fyrir Íslendingum. Svansvottun Kaffitárs tekur til starfssemi kaffihúsanna.

Kaffitár hefur unnið markvisst að því að fá viðskiptavini í lið með sér og lögð er mikil áhersla á að útskýra fyrir viðskiptavinum hvernig unnið er að umhverfismálum. Kaffihúsin hafa í sumum tilvikum gengið skrefinu lengra og bryddað upp á nýjungum sem stuðla að lágmörkun umhverfisáhrifa. Má þar nefna að veittur er afsláttur fyrir þá viðskiptavini sem koma með ferðabolla með sér þegar þeir kaupa sér kaffi sem ekki skal neyta á staðnum en það dregur stórlega úr notkun einnota mála.
Kröfur Svansins fyrir kaffihús og veitingastaði eru mjög strangar og þarf kaffihúsið að vera með gott heildaryfirlit yfir umhverfisáhrif starfseminnar:

• Strangar kröfur eru gerðar til hráefna og matvæla en ákveðinn hluti hráefna þarf að vera lífrænt ræktaður og upplýsa verður neytendur um uppruna matvæla.
• Einnota pappamál og borðbúnað má einungis nota við afgreiðslu á kaffidrykkjum og meðlæti sem ekki er neytt á kaffihúsunum.
• Lögð er áhersla á að velja sem mest af umhverfismerktar vörum og þjónustu í innkaupum.
• Flokkun úrgangs skal að vera góð og tryggja ber að allur hættulegur úrgangur fái rétta meðhöndlun.
• Gerð er krafa um reglulega þjálfun og fræðslu starfsmanna ásamt ferlum til að stýra umhverfisstarfinu.

Sjá þau fyrirtæki sem hafa Svansvottun hér á landi á Grænum síðum.

Sjá þá vöruflokka sem eru í boði af Svansvottuðum vörum hér á landi undir „Vörur/Vottað Svanurinn“ en í hverjum flokki finnur þú hvaða fyrirtæki flytja inn/dreifa viðkomandi vöruflokki og hvað vörurnar heita. Sé varan til nákvæmlega skráð til sölu eða kynningar er hana að finna í Svansbúðinni hér á Náttúrumarkaði. Samsvarandi flokkur er fyrir þjónustuflokkana undir „Þjónusta/Vottað Svanurinn“ hér á Grænum síðum.

Einnig er hægt að sjá gott yfirlit yfir aðilana hér á Græna Íslandskortinu í flokknum „Umhverfisvænar vörur“.

Evaluation

Vistvæn prentsmiðja hjá GuðjónÓ - með Svaninn í 10 ár

Um þessar mundir heldur prentsmiðjan hjá GuðjónÓ upp á að hafa borið Svansleyfi á rekstur prensmiðjunnar í 10 ár. Fyrst fékk GuðjónÓ Svansleyfi árið 2000, endurnýjun árið 2002 og aftur 2008 en þá fyrir prentsmiðjuna í heild, en reglum Svansins var breytt árið 2007, þannig að slíkt varð mögulegt. Skilyrði norræna umhverfismerkisins eru hert í samræmi við framýróun í umhverfismálum í prentiðnaðinum. Í skilyrðum Svansins eru gerðar kröfur sem ná til allra þátta prentunarinnar. Sjá viðmið Svansins um prentverk. Sjá viðmið Svansins fyrir pappír.

Forsvarsmenn fyrirtækisins hjá GuðjónÓ hafa um árabil verið í framvarðasveit umhverfisstarfs á Íslandi og með ráðum og dáðum reynt að stuðla að framgangi þess að umhverfisviðmið og vottanir fái vægi í íslensku viðskiptasamfélagi. Þeir hafa lagt fram óeigingjarna vinnu við að kynna og mæla fyrir því að fleiri prentsmiðjur taki sig til fyrirmyndar og vinni eftir viðmiðum Svansins sem reynst hefur fyrirtækinu gríðarlega vel, bæði sem markaðstæki og leið til hagræðingar og sparnaðar í rekstri. Nú hefur önnur prentsmiðja bæst í hóp Svansvottaðra prentsmiðja á Íslandi þ.e. prentsmiðjan Oddi og er það vel.

Hjá GuðjónÓ er einn hluthafa félagsins að baki vefjarins Náttúran.is og hefur frá byrjun trúað á mikilvægi þess að vefur af þessu tagi komist á laggirnar hér á landi. Hjá GuðjónÓ hlaut Umhverfisverðlaun Reykjavíkurborgar árið 2000. Sjá hér á grænum síðum og grænu Íslandskorti meira um fyrirtækin sem hafa hlotið Umhverfisverðlaun Reykjavíkurborgar og þau fyrirtæki sem hafa Svansvottun hér á landi á Grænum síðum.

Starfsmenn Náttúran.is óska öllum starfsmönnum hjá GuðjónÓ til hamingju með tíu ára Svansafmælið og þakka velvild og stuðning á liðnum árum.

Evaluation

Sæmark sækir um MSC vottun

Fiskútflutningsfyrirtækið Sæmark hefur sótt um umhverfisvottun samtakanna MSC (Marine Stewardship Council) fyrir þorsk, ýsu og steinbít sem fyrirtækið flytur út. Þetta eru mikil tíðindi í sögu umhverfismála á Íslandi, því að hingað til hafa hérlend fyrirtæki og samtök í þessum geira ekki sýnt áhuga á samstarfi við erlenda aðila hvað þetta varðar. MSC er án vafa útbreiddasta og virtasta vottunarkerfi sjálfbærra sjávarafurða í heiminum í dag.

Sæmark er frumkvöðull
Sæmark er fyrsti aðilinn á Íslandi sem sækist eftir MSC-vottun. Fyrirtækið hefur verið í samstarfi við MSC um nokkurt skeið og meðal annars farið í gegnum ákveðið grunnmat til undirbúnings vottunar. Ef vottun fæst mun steinbíturinn frá Sæmarki jafnframt verða fyrsti MSC-vottaði steinbítur heimsins.

Fjögur fiskvinnslufyrirtæki
Fiskvinnslan Íslandssaga hf., Hraðfrystihús Hellissands hf., Oddi hf. og Þórsberg ehf. sjá Sæmarki fyrir fiski, en öll gegna þessi fyrirtæki lykilhlutverki í þeim byggðarlögum þar sem þau eru starfrækt. Hér er um umtalsvert magn að ræða, enda gera þessi fjögur fyrirtæki út 23 fiskiskip sem falla undir umrætt verkefni. Kvóti þessara skipa á yfirstandandi fiskveiðiári er um 6.200 tonn af þorski, 3.300 tonn af ýsu og 1.100 tonn af steinbíti. Aflinn er fenginn á línu, handfæri og í dragnót og fer ýmist ferskur eða frosinn á markaði í Bandaríkjunum, Bretlandi og á meginlandi Evrópu.

Aukin eftirspurn
Verslunarkeðjur í Evrópu gera í auknum mæli kröfur um að fiskur sem þær kaupa sé MSC-vottaður. Þeir sem fengið hafa slíka vottun á afurðir sínar eru því betur í stakk búnir en aðrir til að koma þeim á markað, nánar tiltekið þann markað sem að öðru jöfnu greiðir hæsta verðið. Að sögn Svavars Guðmundssonar, framkvæmdastjóra Sæmarks, sækist Sæmark eftir MSC-vottun til að mæta vaxandi eftirspurn, enda telur fyrirtækið að vottunin styrki stöðu þess á mörkuðum bæði austanhafs og vestan, jafnframt sem nýir markaðir munu opnast. Svavar bendir einnig á að með vottuninni verði auðveldara fyrir fyrirtækið að koma á framfæri upplýsingum til neytenda um sjálfbærni veiða og vinnslu, en slík upplýsingamiðlun verður sífellt mikilvægari eftir því sem umhverfisvitund neytenda eykst.

Vottunarstofan Tún
Vottunarstofan Tún hefur aflað sér réttinda til að sjá um úttektir vegna MSC-vottunar. Gera má ráð fyrir að úttektarferlið taki um það bil 14 mánuði, þannig að Sæmark gæti hampað fyrstu MSC-vottuninni á Íslandi sumarið 2011. MSC-úttektir eru opin ferli, sem allir geta fylgst með og gert athugasemdir við. Þeir sem telja sig eiga hagsmuna að gæta eru hvattir til að hafa samband við Dr. Gunnar Á. Gunnarsson hjá Vottunarstofunni Túni, en hann hefur yfirumsjón með úttektinni og heldur utan um lista yfir skráða hagsmunaaðila.

Loksins
Umsjónarmaður þessarar bloggsíðu fagnar því að íslensk sjávarútvegsfyrirtæki séu loksins komin inn á þessa braut, sem vafalaust á eftir að styrkja stöðu íslenskra sjávarafurða á mörkuðum erlendis í náinni framtíð!

(Af bloggsíður Stefáns Gíslasonar. Bloggfærsla Stefáns  er einkum byggð á frétt á heimasíðu MSC þ. 27. apríl sl., og á frétt World Fishing Today).

Evaluation

Fyrsta Svansmerkta bæklingnum frá Odda nú dreift í Evrópu

Kynningarbæklingur Ferðaþjónustu bænda, „The Ideal Holiday 2010“, er fyrsti prentgripurinn  sem  framleiddur er hjá Odda sem ber Svansmerkið, norræna umhverfismerkið. Bæklingurinn er prentaður í 25.000 eintökum og er hann kominn í dreifingu í Evrópu og víðar.  „Fyrir okkur, sem fyrirtæki í ferðaþjónustu skiptir umhverfisvottun á því prentverki sem við sendum frá okkur miklu máli.  Þegar við vissum að Prentsmiðjan Oddi væri að fá Svansvottun í lok árs 2009 ákváðum við að seinka útgáfu kynningarbæklingsins um nokkrar vikur til að geta Svansmerkt bæklinginn.  Við viljum að ímynd landsins byggist á hreinleika og náttúru og þess vegna þurfum við sem stöndum að kynningu Íslands að vera til fyrirmyndar. Sýnileiki markvissrar umhverfisvinnu skiptir því miklu máli þegar kemur að því að sýna viljann í verki“  segir Berglind Viktorsdóttir gæðastjóri hjá skrifstofu Ferðaþjónustu bænda sem er vottuð af Green Globe, alþjóðlegum umhverfisvottunarsamtökum í ferðaþjónustu.

Sjá Prentsmiðjuna Odda hér á Grænum síðum, og á Grænu korti í flokknum Grænt fyrirtæki en sá flokkur sýnir öll fyrirtæki á Íslandi sem hafa annað hvort Svaninn eða Green Globe.

Mynd: Sævar Skaptason framkvæmdastjóri Ferðaþjónustu bænda og Berglind Viktorsdóttir gæðastjóri og ritstjóri bæklingsins taka við fyrsta umhverfisvottaða eintakinu hjá Stefáni Hjaltalín sölustjóra hjá Odda.

Evaluation