Nagladekk bönnuð eftir 15. apríl

Nagladekk eru bönnuð á götum Reykjavíkur eftir 15. apríl. Hlutfall nagladekkja reyndist vera 22,8% þegar talning var gerð miðvikudaginn 18. apríl sem er meira en var á sama tíma í fyrra eða 20,3%. Naglar valda bæði hljóð- og loftmengun í borginni. Styrkur svifryks hefur aðeins farið einu sinni á árinu yfir heilsuverndarmörk en hafði á sama tíma í fyrra farið 8 sinnum yfir mörkin sem eru 50 míkrógrömm á rúmmetra. Ástæðan er sú að úrkomusamt hefur verið í borginni. Ökumenn eru hvattir til að skipta um hjólbarða í einum grænum.

Grafík: Mengun í Reykjavík, Guðrún A. Tryggvadóttir og Signý Kolbeinsdóttir.